US Indianapolis Chin Mino Pawl Cu Lungrawk Taktak An Si Cang An Pial Cikcek Ko Hih A Poi Kho Taktak

US Indianapolis Chin Mino Pawl Cu Lungrawk Taktak An Si Cang An Pial Cikcek Ko Hih A Poi Kho Taktak

Indianapolis Chin Mino Kong Khawi van ial ve tuah ning. Ram hi micheu nih cun mipem ram an ti. Ti phu si. Wikipedia nih an langhter ning ahcun US i a pemmi hi ram 109 in an si. Mexico (11 million), India (2.4 mil), China (2.1 mil), Philippine (1.9 mil), El Salvador (1.3 mil), le Vietnam (1.3 mil) hi tamcem a pemmi ram an si. Burma ram in a pemmi hi ting khat le cheu deng (142,494) kan si i a tamcem 47 nak a si ve. Hi chungah Chinmi cu thong 50 renglo hrawng cu kan si ve lai.

US i an pemka cio ah hin miphun dang; Mexico, Vietnam, le Philippine tbt. pawl zong hi an rak buai tuk ve cio ko rua. An mino pawl hi misual (gang) bu ah an lut hna i nulepa hi awlokchong in an rak umter ve hna tiah kan rianṭuanpi hawi Spanish nu nih a ka chimh. Nain, US mipem lakah hin Korea le India tbt. miphun hna cu hi bantuk buainak phun; inn bauh i thil firpiak ti le mi hrokhrol bu (gang) i luh ti phun hi an hmang ve lem hoi loh. Mipem cio cio ziah ai dan hnga ti ruah tikah. A tawinak i ṭial ahcun, harnak le sifah buin US i a pemmi miphun pawl deuh nih acung i kan langhtermi buainak phun hi an rak ton ciomi cu a si ko rua.

Zeitin dah mipem ngakchia/mino pawl hi hrokhrol hram an i thawk i mi hrokhrol bu (gang) tiang an luhnak a ruang si ti hlathlai tikah a phunphun puh ding a um. Pakhatnak ah, Sianginn le khuachung tbt. i an tlonlennak hmun ah mi dang nih nehsawh le tihraam (bully) an ton tawn ruang ah hawi i sawm in bu dirh ve i siloah mi hrokhrol bu sinah itel in duhsah in sualnak khur i pil thai hi mi tampi nih an tonmi si.

Image may contain: 3 people

Pahnihnah ah, mipem hi phakka ahcun a buin hmunkhat ah um ṭi deuh a si tawn. Fale zong hi nulepa rianṭuan kar ah a bu buin an tlongleng ṭi hna i hmunkhat i an tlonlen ṭi tamtuk tikah duhsah in kuak zuk, zudin le thil sual dang dang tuah an i hrawt hna i kum 2, 3 hnu ahcun nulepa nih kham khawh ti lo ding tiang dirhmun ah ai chuahmi an um hna.

Athumnak ah, mi hrokhrol (gangsters) pawl hi an sin i mi dang sawm le luhter hi an rian biapi cem pakhat a si. Hawi an sawm hna tikah a cheu cu alak in riitsi an pek hna i an leemter hmasa hna. A cheu cu tharum he an tlirhkhawnh hna, an vuak hna i an luhter chih hna ti a si. Nungak dauter tehna in an lemsoi hna ti si. Palinak ah, Chungkhar a buai tukmi le nuva ai ṭhenmi hna fale hi an ngaihchiat le lungrawh tuk ruang ah inn ah um duh lo in a vakvai i mi hrokhrol sinah ai fon thaimi hi an tampi ti a si fawn.

A ruang dang tampi a um tung rih lai. Hi vial hi si ko seh law. Acung i phun li (4) kan langhter mi hi atu lio vawlei kil li deng tiang a thang mi Indy Chin sahngar rual pawl sining ai thawknak cem zong a si ve ko rua ti hi pheh awk ṭha lo a si. A buin apartment ah umpi mi fale, zan ah rianṭuan tak i an mah lawng umter pengmi fale, chungkhar a buai tuk i nuva ai ṭhenmi fale, le abu buin a tlongleng ṭi tukmi ngakchia pawl hi nulepa nih daithlanh hna lo ding a herh khun zia hi acung i kan langhtermi thil nih a fianter ngaimi a si ti hi van chim chap ka duh.

A donghnak i langhter ka duhmi cu hmanthlak ka tar chihmi pa kong hi si. Kum 2014 ah khan “Darion Harris” timi pa nih hin meithal dawr a bauh i meithal a rak fir ve. Dawr ngeitu zong meithal in a rak kah. Duhsah in an hlat i a hnu ah an tlaih khawh. Kan hnu thla July ah khan biaceih zung ah an chuahpi i kum 30 chung thong thlak dingin bia an khiahpiak. Meithal dawr bauh i meithal fir le meithal he mi thlirhkhonh le thil chuh tbt. pawl hi sual lian taktak (federal crime) bak a si caah hi bantuk sualnak a tuahmi pawl hi an luatter hrimhrim hna lo ti hi sahngar rual pawl nih hin hngal hna seh law ṭha hnga.

Indianapolis Whiteland sang i meithal dawr a bauhmi le meithal zun 33 a firtu hna zong minung 4 cu an tlaih khawh cang hna tiah ṭuanvo ngeitu sinin theih a si. Atulio zei tuak lo kan mi pialsual pawl hi hiti ningte i an cawlcangh peng rih ahcun nunchung khirh awk ṭha ti lo le thlen awk ṭha ti lomi sining an i khih thai telai ti hi a fiang. An caah ngaihchia ngai khi a si. Kum 18 tlin rih lo ruang ah thongthlak thai rih lomi le tlaih rih lomi an si caah kan zalong/luat peng lai ti hi an i ruah sual cikcek telai.

Hi bantuk a pialsual cangmi fale/mino pawl ziaza thlenter ding hi cu thil fawi cu a si ti lai lo. A si kho dingmi tu cu, hmun dang i umternak ding nulepa nih tuaktanpiak ding. Asiloah, nulepa zong nih hmun dang ah ṭhialpi ko ding. A herh ahcun, Kawlram i tlunternak ding hmanh tuaktanpiak deuh ding an si ko. Cu ti lo ahcun, hi sualnak khur in chuahter khawhnak ding lam hi a um lo tluk a si ko ti hi caṭialtu pa biafunnak cu a si. Credit: The Chin Voice

Note: The Chin Voice Page hi like le follow in thazaang pe cio hna usih!

Leave a Reply

Your email address will not be published. Required fields are marked *