President Trump Nih Ralzaam Laknak Kong A ChimmI Cu A Poi Ko A Zat Zong A Chim Cang

President Trump Nih Ralzaam Laknak Kong A ChimmI Cu A Poi Ko A Zat Zong A Chim Cang

President Trump cozah nih 2020 fiscal kum caah ralzam minung 18,000 tiang lawng US ah lak kan timh tiah an chim. US tuanbia ah US nih kum khat chung ah ralzam a lak tlawm cem kum a si an ti. 18,000 chung ah 4000 cu Iraqis pawl, 5000 cu biaknak ruang ah hremnak a tongmi, 1500 cu Honduras, Guatemala, El Salvador, le a tangmi 7500 cu a dangdang ca ah si lai ti si. Ref:Reuters

ISRAEL THIMNAK HNUZUL:
September 17 i tuahmi Israel Parliament thimnak ah cozah a ser kho dingmi party a tlingmi an um lo. Party dang he ṭanṭi lawng ah cozah a ser kho ding in an um hna. Cozah ser khawhnak ding ah a tlawm bik seat 61 hmuh a herh, seat 120 chung ah.Nithumni ah khan President Rivlin nih seat tam cem a hmumi party 2; Benjamin Netanyahu hruaimi Likud party le Benny Gantz hruaimi Blue and White party hi hmun khat ah cozah ser ṭi ding in a fial hna nain B&W party nih an duh lo caah Benjamin tu nih ni 28 chung ah party dang i sawm i cozah thar ser ding in president nih a fial.

Benjamin nih ni 28 chung ah hawi ai sawm khawh lo i cozah a ser khawh lo ahcun W&B party hruaitu Benny Gantz hi hawi i sawm i cozah thar ser ding in fial a si ve lai. Benny Gantz zong nih cozah a ser khawh ve hlei lo ahcun kum dih hlan ah thimnak an tuah ṭhan hau lai i kum khat chung ah thimnak voi thum (3) an nei ti nak si telai. Thimnak tuah ṭhan ding cu phaisa tamtuk a dih ding si caah a si khawh chung in thimnak um ṭhan lo ding in president Rivlin nih hrial a timh ti a si. Ref: Reuters Nikhat khat ah cun Chin state zong ah coalition govt. hi dirh a herh caan a um ve te kho mi a si.

FRENCH PRESIDENT HLUN A THI:
Zahan (9/26/19) ah kum 86 upa French president hlun Jaccques Chirac a thi. Chirac hi kum 1985-2007 tiang term hnih chung president a ṭuanmi a si. Kum 1974-1976 le 1986-1988 zong ah Prime minister a ṭuanmi a si fawn. Paris Mayor zong kum saupi a ṭuanmi a si. President a ṭuan chung ah president term kum 7 a si tawnmi kum 5 ah a thlen. French ram ah European phaisa hman zong a thawk pi hna. Ref: Reuters

UK PM AI CHUAHSUAK DEUH:
British Prime minister Boris Johnson nih UK parliament thihter chung (suspend) a timh seek mi cu phunhhrampi kalh (Unlawful) a si tiah Supreme Court nih an ti piak cang i MPs pawl nih biatak tein an mawhchiat chin. Cu maw ka duh lai ti phun in bia faakfaak in a ti chin hna i a dohtu MPs an thinlinh a zual. Ref:Reuters

Britain pawl an buai cemmi cu European Union in chuah an timhnak kong a si. EU in chuah ding le ding lo (Brexit) Referendum an tuahmi ah chuah ding nih a tei caah October 31, 2019 hi a hnu bik ni (deadline) a si. Atu tiang EU chungtel dang hna he hnatlaknak an tuah khawh rih lo caah PM Boris nih hin hnatlaknak um lo zong in kan chuah tak hrimhrim hau cang tiah ai timhmi a duh lotu pawl nih kham kho hna hlah seh tiah Parliament hi thih/dinhter chung a timhmi hi si. Asinain, phungram kalh a si caah zei lam in dek chuahpi a timh tehna lai theih a si rih lo. A duh lotu pawl nih cun a ni (deadline) hi thawn usih law tlamtling tein ceih rih usih ti an duh. Boris nih a duh ti lo. Cucu an buai cem nak cu si ko. Ref:Keimah

KAWLRAMMI TLAIH/KUATMI:
Thailand cozah nih Kawlram mi minung 109 Myanmar ramri Kawhtong ah an van kuat hna tiah Myanmar Immigration ṭuanvo ngeitu nih an chim. July thla zong ah Kawhtong ramri hin minung 258 an rak kuat cang hna ti a si. Ref:Irrawaddy

ROHINGYA RALZAM UMNAK:
Bangladesh cozah nih Ronhingya/Bengali ralzam pawl umnak Camp 3 thirhri hling in kulhpiak, CCTV bunh le a vengtu umnak ding donhhlei (tower) kan tuah lai an ti. A ruang cu camp chung ah hin sualnak phunphun: gang phu, riitsi zuar, le phaisa lak in ramdang i minung kalter tbt. (human trafficking) a tuahmi um tiah an zumh. Tukum chung lawng ah Rohingya camp chung ah minung 39 cu meithal kahnak in an thi cang ti a si. Ref:Telegraph

Rohingya ralzam pawl Kawlram i an kirnak ding kong ah Myanmar, Bangladesh le China palai pawl UN meeting tuahnak New York ah tonnak an ngei hna. China nih Rohingya ralzam pawl kirnak ding hi tlangtlaakpi a van timh hnik hna. China ngai nih khuazei hlei a phakpi kho hna lai lo tiah mi tampi nih an sawi len.

NI 70 RAWL EI DUH LO IN UM:
Mexico lei in US ram ah phung ning lo in a lut ve mi El Paso Texas ah an hrenmi Ajay Kumar, kum 33 India pa cu asylum a sawk lengmang nain an cohlanpiak duh lo caah ni 70 chung rawl ei duh lo in a um. A pawng zong cheu 3 cheu 1 a zor caah a umnak ding theih khawhnak ding seh (tracking device) a ke ah an khihpiak i chuahter chung nak nawl an pek. Laimi/Chinmi hlah maw US ram pem a duh cemmi kan si lai ti na lakah miphun dang tu an rak si deuh. Ref:Guardian

SUPER BOWL 2020 SHOW AH:
Kum vui 2020 Super Bowl tik i a karlak dinh caan i zapi nuamhnak a tuahtu ding ah hlasak thiam, muidawh, tungtai rem, pa orfok, ziam kho lo nu pahnih Jennifer Lopez le Shakira an thim hna. Super Bowl hi February 2, 2020 ah si lai i Miami, Florida ah tuah a si lai. Ref:#Guardian

FACEBOOK AH LIKE LANG TI LAI LO:
Facebook a hmangmi nih caṭialmi or hmanthlak tarmi pawl LIKE an tuahmi zat, video an zohmi zat, siloah hi bantuk phun:  an tuahmi pawl hi mi dang nih hmu kho ti lo ding in thlen an timh. A thlah/post tu lawng nih hmuh khawh ding in an chiah cang lai ti si. Ref: Guardian

The Chin Voice

Leave a Reply

Your email address will not be published. Required fields are marked *